Cairn: Neriorsuinikuunngilagut

Akuutissanik inerteqqutaasunut taaneqarsinnaasunik 200 tonsingajalluinnarnik Cairn Energyp qillerinermini Nunatta imartaanut maqititsissinnaanissaa, Naalakkersuisut akuersissutigeqqammerpaat. Maqititsisarnerulli siunissami annikillisarneqarnissaa piumasaqaatigineqanngitsoq Cairn Energymit oqaatigineqarpoq.
Allattoq Mads Lynge
maajip 25-at 2011 10:44

Misiliilluni aasaru qillerinerit avatangiisinut sunniuteqaatigisinnaasaat suunersut, Danmarkip avatangiisinut misissuisoqarfiata, DMU-p, nalunaarusiorfigisimavaa.

DMU-p nalunnarusiornissaa Aatsitassanut Pisortaqarfiup kissaatigisimavaa.

- Akuutissanik pinngortitami arrortikkuminaassinnaasunik maqititsisarnerup siunissami annikillisarneqarnissaanut atatillugu Cairn Energyp suliffeqarfiata Capricornip septembarip aallaqqaataatinnagu pilersaarusiorsimanissaa, DMU allappoq, piumasaqaatillu aatsaat malinneqarpata akuersinissartik siunnerfigalugu.

Akuutissanilli maqititsisarnerit siunissami annikillisarneqarnissaanut piumaffigineqarnersut Cairn Energymut apeqqutigaarput, imatullu akissuteqarput:

- Akuutissanik maqititsisarnerit annikillisarneqarnissaanut neriorsuinikuunngilagut, pisussaaffilerneqarsimanatalu, Inatsisinut tunngassuteqartunut tuniniaanermullu Cairn Energymi pisortap Simon Thomsonip oqaatigaa.

Akuutissaq Ultrahibimik taaguutilik qillerinermi atorneqarniarpoq. Akuutissaq taanna itisuumi qillerinermi atorneqartarpoq, qillerivimmi naqitsinerup allanngorartuunnginnissaa matumani anguniarneqartarluni.
Norgemi qillerinermi maqitinneqarsinnaasunut naleqqiullugu Cairn Energyp arfinileriaammik annertunerusut ukioq manna qillerinermini maqitissinnaassagai oqaluttuarereerparput.
Norgemi qillerinerni maqitsisarnerit annikillisarneqarnikuupput, akuutissat avatangiisinik mingutsitsinnginnerusut tamaani atorneqarnissaat piumasaqaataammat, soorlu aamma marullup qillerinermi mingutsinneqarsimasup aalajangersimasumik inissinneqartarnissaa piumasaqaataasoq.

Periarfissaq taanna Nunatsinni atorneqassanngitsoq, Aatsitassanut naalakkersuisup Ove Karl Berthelsenip nalunaarutigereerpaa, piumasaqaateqarsimanersorli nalunarallarpoq.

Danmarkip avatangiisinut misissuisoqarfia, DMU, oqarpoq, piumasaqaateqartoqarsimasoq, Cairn Energy akerlianik oqartoq.

Aatsitassanut naalakkersuisoq, Ove Karl Berthelsen, tamanna pillugu qanoq isumaqarnersoq ullaap tungaa oqaaseqartinniaraluaratsigu iluatsinnilarput.