Cairn milliartilikkaanik aningaasaleeqqinniarpoq

Uuliasiortitseqatigiiffik Cairn Energy Kalaallit Nunaanni uuliamik suli ujaaseqqinnissaminut koruuninik milliartilikkaanik aningaasaleeqqinnissaminut piareerpoq.
oktobarip 07-at 2010 09:39

Aningaasat 1,2 milliardit dollarsit, tassa 6,5 milliardit koruuningajannik, aningaasaleeqqinnissaminut atorneqassasut suliffeqarfissuup pisortaanera, Mike Watts, Tuluit Nunaanni aviisimut ullormut saqqummersartumut, The Independentimut, ullumi taama oqarpoq.

Cairn Energyp siullerpaamik misiliilluni qillerinera naammasseqqammersoq iluatsilluarsimanerarpaa, pokertaraannigooq iluatsineq taamaattoq taaneqartarpoq "royal flush".

Qillerinernit pingasunit inernerit kingulliit tamanut saqqummiunneqassasut aamma ilisimatitsissutigaa - qillerinerit oktobarip ulluisa aallaqqaataanni naammassipput.

- Kalaallit Nunaanni ukioq manna qillerinitta inerneri ilimageriikkatsitut iinnangajapput, tassami ilimagereerparput Kalaallit Nunaat uuliasiorfissuanngussasoq nutaaq, Mike Watts The Independentimut oqarpoq.

- Uuliamik aningaasarsiutaasinnaasumik nassaarsimalluta paasigutsigu, Kalaallit Nunaanni suna tamarmi allanngussaaq, erseqqissaavoq.

Namminersorlutik Oqartussat tulliani uuliasiortussarsiulerpata uuliasiortitseqatigiiffiit nunarsuarmi annersaat arlallit neqerooruteqassallutik piareersimasut aviisimit aamma uppernarsarneqarpoq.

Cairn Energy misiliilluni qillereqqinnissaminut aamma qinnuteqaqqissamaarpoq, tullianili qillerisussanik qinnuteqartitsinissaq ukiut pingasut qaangiuppata siusinnerpaamik aatsaat pissalluni.