Cairn Libanonimut saannialerpoq
Cairnip siorna qaammatinut siullernut arfinilinnut naatsorsuutaani atuarneqarsinnaavoq, Cairnip Libanonimi qillerisinnaanissamut akuersissummik qinnuteqaateqarsimasoq. Cairnip taamaalilluni Akullersuarmi aallutani annertusarnialerpai.
Siorna qaammatinut siullernut arfinilinnut naatsorsuutit Cairnip saqqummiuteqqammerpai, uuliasiortitseqatigiiffiullu pisortaanerata Simon Thompsonip tusagassiortunik attaveqaatitigut katersortitsinermini erseqqissaatigaa Cairnip Akullersuarmi uuliasiornissaq aallutarinialeraa, akuersissutinillu qinnuteqaateqarnialersoq.
- Tamaani uuliasiornissaq soqutigineqaqaaq, Libanonimilu uuliasiorsinnaanissaq pillugu Cairn Energy periarfissarsiorniarpoq, Simon Thompson oqarpoq.
USA-mi ujarassiuutut misissuiffiup US Geological Surveysip naatsorsuutigaa nappartat 1,7 milliardit Libanonimi immerneqarsinnaasut, naturgassilu suli annertunerusoq nassaassaasoq.
Kalaallit Nunaanni ukioq manna qillerinerni uuliamik nassaartoqarsimanngitsoq Cairnip nalunaarutigereeraalu, Cairnip Libanonimi uuliasiorsinnaanissamik ujartuinera saqqummiunneqarpoq.
Cairn Energyp naatsorsuutaani takuneqarsinnaavoq Cairn Energyp Nuummiit 300 kilometerinik avasitsigisumi qilleriviani, Lady Franklinimi, qillerinerit 772 millionit koruunit missaannik akeqarsimassangatinneqartut. Qillerivik Lady Franklin Cairn Energymit matuneqareerpoq qimanneqareerlunilu.
Kalaallit Nunaanni aasaq manna qillerinerit katillugit 3,1 milliardit koruunit missaannik akeqarsimassangatinneqartut, naatsorsuutini aamma takuneqarsinnaavoq.
Libanonimi qillerilersinnaanissamik aallussinermi saniatigut Cairn Energyp Kalaallit Nunaanni qillerinermi allanit akisussaaffigineqalernissaat, Cairn Energyp sulissutiginialerpaa, taamaalinnikkut isertitaqarnissartik qulakkeerniassagamikku.
Qilleriviit uuliasiortitseqatigiiffinnut allanut, assersuutigalugu Shellimut, tuniniarneqarsinnaanissaat, Cairn Energyp taamanikkut marsimi pisortaanerata, Bill Gammellip siunnersuutigigaluarpaa, taamaalisoqassanersorli suli nalunarpoq.
Kalaallit Nunaatali imartaani uuliaqarsinnaanissaa Cairn Energyp isumalluarfigiuarsinnarpaa.
