Cairn isumaqatigiissumik atsioqatigineqarpoq
Isumaqatigiissummi nutaami atuarneqarsinnaavoq, suliassaqarfinni tamani Cairn sullissinerminik annertuseriartitsisoq. Suliffeqarfiup Kalaallit Nunaanni 2010-mi nioqqutissanik pisiortornermini sullissinerminilu 153 millionit koruunit atorsimavai, anguniaagavorlu isumaqatigiissummi nutaami 244 millionit koruunit atorneqarnissaat.
Ukioq kingulleq kalaallinut sullissisunut mikinerusunut aningaasat 19 millionit koruunit aammattaaq atorneqarsimapput. Isumaqatigiissummi nutaami taakkununnga atorneqartussat 67 millionit koruuninut tagginneqarput.
Namminersorlutik Oqartussanit tusagassiuutitigut nalunaarut naapertorlugu annertuseriaatit "suliap aallartinnerata missaani Cairn kalaallinik sullississangatinneqartunik toqqaannartumik ataatsimeeqateqartarsimammat".
Aammattaaq Cairnimit naatsorsuutigineqarpoq ilinniartitaanermut aningaasaateqarfimmut 2,6 milllionit koruuninik ikisiniarluni naak siorna ikisatik 1,3 millionit koruuniusimagaluartut.
Kiisalu suliffeqarfiup kalaallinik sulisussaminik suli tallimanik atorfinitsitsiniarluni pilersaarutigaa, taamaalilutik ukiumi kingullermi 50-iusimagaluartut maanna 55-inngortillugit.
