Cairn Energyp qilleriviit marluk matuippai

Nal. 1419. nutartigaq

Qillerissutit Stena Don aamma Stena Forth atorlugit qillerinerit unitsinneqareerput, immallu naqqani qillerivik Alphamik taagugaq matugallarneqareerluni. Taanna kingorna pisariaqalerpat itinerusumik qillerinermut atorneqariaannaavoq.

Qillikkalli allat marluk T8 aamma T4 qaqugorsuarmut ammaqqittussaajunnaarlugit matuneqareerput.

Uuliasortitseqatigiiffiup Cairn Energyp pisortaata tulliata, Mike Wattsip qillerinerit inerneri "isumalluarnartorujussuusut" oqaatigaa.

- Aasarmanna qillerinermit paasissutissat tamaasa nalilersoqqissaassavavut. Aappaagumut misileraalluni qillerinissanut pilersaarutivut ingerlallualereerpavut, naatsorsuutigaarpullu ukiortaap kingorna qaammatit pingasut siulliit iluanni tamanut saqqummiussisinnaajumaarluta, Mike Watts tusagassiuutinut nalunaarpoq.

Issittumi uuliasiulernissaq avatangiisinut, uumasunut inunnullu ulorianartorsiortitsissasoq Greenpeacemit ullumi nalunaarummi oqaatigineqarpoq.

- Suliffeqarfissuaq nalilimmik nassaanngilaq, naak aningaasarpassuarnik atuigaluarluni, taamaattumik suliffeqarfimmi aqutsisut silattortariaqalerput, Greenpeace nalunaarummini ilaatigut oqarpoq.