Cairn Energyp misilittagakinnera oqallisaalerpoq
Cairn Energy nunani issittuni uuliamik qillerinermik misilittagaqanngitsoq ICC-p nunatsinni siulittaasuata Aqqaluk Lynge, aviisimut ingeniørimut oqarpoq.
Taamatut oqarneq ilumuunngitsoq, aatsitassanut naalakkersuisoq Ove Karl Berthelsen akivoq.
- Issittumi immami qillerinermik misilittagaqannginneq ilumoorpoq, unami pineqarpoq aasaanerani qaammatini pingasuni qillerinissamut akuersissummik tunisigatta, Ove Karl Berthelsen nassuerluni oqarpoq.
Uuliasioqatigiiffiup Cairn Energyp aningaasarsiornikkut pisortaata Simon Thomsenip oqaatigaa Cairn Energy suli issittumi qillerinermik misilittagaqanngimmat. Taamaattorli issittumi qillerinermi misilittagalinnik sulisussaqarlutik oqaatigaa, qasserpiaanersulli oqaatigisinnaanagu.
Cairn Energyp sulisui qanoq annertutigisumik issittumi qillerinermik misilittagaqartiginersut KNR-ip erseqqissumik paasiniaraluarpaa, tamannali ajornaatsuinnaanngitsoq paasinarsivoq.
Cairn Energyp marlunngornermi juunip 22-anni tusagassiortunik katersortitsinermini aamma tamanna erseqqissumik akisinnaanagu oqarpoq.
Ove Karl Berthelsenip tamanna aamma naqissuserpaa
- Qanoq misilittagaqartiginerat teknikkikkullu piumasaqaatit assigiinngitsut pisinnaallugit nalunaarusiorsimanerat naalakkersuisunut saqqummiunneqarnikuuvoq, taassuma iluaniippoq issittup imartaani aasakkut qillerinermut qanoq misilittagalinnik qanorlu teknikkikkut pisinnaasalinnik ilumut uppernarsaallutik takutitsisinnaasimammata aatsaat akuerivagut, Ove Karl Berthelsen oqarpoq.
Cairn Energyp Qeqertarsuup kitaani sulisussat sikoqartillugu qillerinermi katillugit ukiunik 25-nik misilittagaqartut aammalu Qeqertarsuup kitaanisut isikkulinni qillerinernik katillugit ukiuni 400-ni misilittagaqartut, Aatsitassanut pisortaqarfiup pisortaa Jørn Skov Nielsen oqarpoq.
Cairn Energyp oqaatigaa imaannarmi qillerinermi sulisut katillugit ukiuni 300-ni misilittagaqartuusut.