Cairn Energy: Uuliamik suli nassaanngilavut

- Uppernarsarsinnaavara uuliamik suli nassaannginnatta, kisiat qilleriffigisatta akorisaasa takutippaat uuliaqarsinnaasoq tamannalu neriulluarnarpoq.

Naak ukiuni marluk pingasuni misissueqqissaarnerpassuit ingerlatereersimagaluarguit, piareersarluarsimagaluarlutalu qillerilertinnani sumik nassaassanerluni nalunarluinnartarpoq.

Angusarpullu qiimaallannaqaaq Simon Thompson Cairnikkut nunatsinni misiligaanerinut akisussaasoq oqarpoq.

- Pingaartoq aana, qilligarput gassimik nassaarfigaarput tamannalu pingaaruteqarluinnarpoq. Tamassumami takitippaa ilimagisimasagut eqqortuusut, taamaammallu misiliilluta qillerinigut ingerlatiinnartariaqarpagut.

Ullumikkut gassimik nassaarnitta uuliamik nassaarsinnaanerput mattutinngilaa. Simon Thompson oqarpoq.

Cairn Energy suli qilleriuarsinnarpoq, taamaakkaluartorlu Simon Thompson ima oqarnissaminut kisinngilaq.

Naak Simon Thompson naamagisimaarinnikkaluarluni qulanngippallaarnissaminut mianersorpoq.

- Piviusorsiortariaqarpugut, qillerilinnginnitsinni oqarpugut misiliinerit quliugaangata ataaseq gasseqartarsinnaassasoq, taamaammat misiliiffik siulleq nassaarput qiimaallannarpoq.

Ujaasiuartariaqarpugullu misilitassagullu tamaasa naamassitinnagit naluarput iluatsitsissanerluta.

Simon Thompson oqarpoq.

Uuliamik nassaartoqassanngikkaluarpat gassimik tunisassiornissamut sangusoqarsinnaanerluni?

- Tamaattoqariaannaavoq, kisiat massakkumuugallartoq gassi nassaarput ima annertutiginngilaq allaat tunisassiarineqarsinnaalluni, anginerusumillu nassaaraluarutta, aap taamaalluarsinnaavoq.

Cairn Energy massakkumuugallartoq sisamanik qillerinissamut akuersissutinik pereerpoq. Misileraanerlu septemberip naalernerani naamassissapput.

Kingornalu aatsitassanut naalakkersuisoq aalajangiiumaarpoq misileraaqqittoqarnissaanut akuerissuteqartoqaqqissanersoq.