Cairn Energy: Suna tamarmi isumannaareerpoq

Uuliamik misiliilluni Qeqertarsuup Diskop avataani qillerineq ippassaani aallartinneqarpoq, qillerussuarlu sillimatitut atorneqartussaq suli Canadami Halifaximiimmat Greenpeacep isornartorsiorpaa.
Allattoq Nauja Møller
juulip 02-at 2010 15:41

Cairn Energymi attaveqarnermut pisortap Davis Nisbetip oqarnera malillugu suna tamarmi isumannaareerneqarsimavoq:

- Isumaqarpugut Namminersorlutik Oqartussat uagullu Cairn Energy, Kalaallit Nunaata sineriaani aasaq manna qillerinissamut tunngatillugu pilersaarusiukkagut qajannaatsuusut. Maannakkut qilleriffipput, immap naqqata qaava, uuliaqanngilaq, Davis Nisbet Cairn Energymeersoq oqarpoq nangillunilu.

- Qillerussuaq sillimataasussaq Stena Forth Kalaallit Nunaannut tikiutsinnagu uuliaqarfiusoq qillerfigilerneqalernavianngilaq. Killiffiit ilisimavagut, Namminersorlutik Oqartussat nalunngilaat sumut killinnersugut, qillerilluta aallartinnerput nuannaarutigaat ernumanartoqartinnagulu, David Nisbet oqarpoq.

Greenpeace Nordicip qullersaa, Mads Flarup Christensenip issittoq mianernartippaa qillerisoqarneralu iluarinagu. Qillerussuaq sillimataasussap suli Canadamiinnera isumaalunneranut millisaataanngilaq, ajutoortoqassagaluarpammi ikiortissaqanngimmata:

- Ajornartorsiut unaavoq, marlunnik sillimatitut qilleruteqarnissaanut pissutaavoq qillerinerni maqisoortoqassagaluarpat matoorisinnaasutut sillimmataassammat, Mads Flarup Christensen oqarpoq.

Cairn Energyp qillerinissamut akuerineqarnissaanut Namminersorlutik oqartussat tunuarsimaartariaqartut, Greenpeace isumaqarpoq:

- Isumaqarpugut qillerinerit aallartinneqarnerat illersorneqarsinnaanngitsoq, Namminersorlutillu Oqartussat maannakkut qillerinerit unitsittariaqarpaat, Greenpeacemeersoq Mads Flarup Christensen oqarpoq.

Amerikamiut Canadamiut Norgemiullu Mexicop imartaani ajutoornersuup paasineqarnissaata tungaanut, immap naqqani qillerinerit unitsitsereermata, Cairn Energy qillerinissamut akuerineqarsimanera Greenpeacemiit ajornartorsiutitut isigineqarpoq.