Cairn Energy suna tamaat atorlugu uuliamik nassaarniarsarissaaq

Suna tamaat akigalugu aningaasaliinianngilaq, taamaattorli uuliamik ujaasinermi aningaasarpassuarnik atuiniarpoq.

Cairn Energyp Kalaallit Nunaanni suliaqarnermini suliai sunniuteqalereersut, uuliasiortitsiviup Cairn Energyp tunisassiornermut pisortaa, Simon Thomson oqarpoq.

- Uteriitsuusariaqarpugut, uteriitsuuvugullu, Simon Thomsen oqarpoq.

- Nunarsuarmi sumiluunniit uuliamik ujaasisoqartillugu, nassaartoqanngippat ujaasinermi aningaasanik atuinerup unitsinneqarnissaa piffissanngortarpoq. Taamaammat ukiuni marlunni pingasuniluunniit uuliamik ujaasiniarluta neriorsuinikuuvugut. Piffissaq atorneqartussaq sivisuvoq tassuunatigut tunniusimanerput takussutissaavoq, Simon Thomson oqarpoq.

Erseqqissaatigaa uuliamik ujaasinermi Naalakkersuisunit piumasaqaataat tamaasa naammassisimallugit.

- Piaartumik uuliamik nassaarnissaaq misilissavarput, isumannaallisaanerlu ajunnginnerpaavoq, Simon Thomson oqarpoq.

Uuliasiortitsiviup Cairn Energyp Kalaallit Nunaanni sulinera Kalaallit Nunaannut sunniuteqalereerpoq.

- Kalaallit Nunaanniinnerput uuliasiortitsivinnit allanit soqutigineqarluarpoq, Kalaallit Nunaannullu soqutinninnerat annertusilluni, nangippoq.

Cairn Energy Aasiap kangiata kujataani uuliasiorlutik aallartikkamilli allanut maligassiuisimapput.

- Uuliasiortitsiviit allat Aasiami uuliarsiulernissaannik soqutiginnilersippavut. Ineriartorneq taamatut ittoq Kalaallit Nunaanni misigeqqikkusupparput, taamaaliulerpugullu, oqarpoq.

Uuliasiortitsiviup Cairn Energyp sulerinera suliaalu uuliasiortitsivinnit allani alapernaanneqartuarput, misilittagaallu ilikkarfigineqartarlutik.

Simon Thomsonip erseqqissarpaa, Cairn Energyp uuliamik nassaarnissaa suli ilisimaneqanngitsoq, pisinnaasartilli tamaat atorlugu ujaasiniarput, ujaasinermilu teknikkimi atorneqartut ajunnginnerpaat atorneqarmata.