Cairn Energy sumiiffinni arlalinni qillerissaaq

Kalaallit Nunaata kitaata sineriaani uuliaqarneranik misissuinerit siumut annertussusileriikkanut agguagaapput, misissugassaq ataaseq 10.000 kvadratkilometeriulluni. Taakkunani misissueqqaarnerit takutippaat uuliaqarneranik isumalluarnartoqartoq, tamannalu tunuliaqutigalugu Cairn Energy misissugassanut allanut marlunnut akuersissummik piniassamaartoq, Aatsitassanut pisortaqarfiup pisortaa, Jørn Skov Nielsen oqarpoq, nangillunilu:

- Qeqertarsuup tunuani ukiuni kingullerni marlunni misissuisoqarpoq, tamaani uuliamik gassimilluunnit peqarneranik misissuisoqarluni. Misissuinerit taakku naammassisimalerneri Qeqertarsuup tunuani illoqarfiit innuttaannut maanna tusarniaatitsissutigineqarput.

Upernaamut misissuinissanut marlunnut aamma qinnuteqassamaarlutik Cairn Energy saaffiginnereerput. Tamatuma ersersippa Qeqertarsuup tunuata uuliaqarluarsinnaanera, Aatsitassanut pisortaqarfiup pisortaa, Jørn Skov Nielsen oqarpoq.

Qeqertarsuarmi innuttaasut katersortarfimmi unnummut tusarniaaffigineqassapput. Cairn Enertyp saqqummiutissavaa misissuinerit inerneri, avatangiisit qanoq sunnigaasinnaaneri aamma qalluinerup kinguneranit aningaasarsiornerup sunniutigisinnaasai.

Aatsitassanut Naalakkersuisup, Ove Karl Berthelsenip oqalugiaatigissavaa, suliffeqarfiit misiliillutik qilleriniartut Namminersorlutik Oqartussanit qanoq piumaffigineqartarneri.

Aqagu Uummannami innuttanut tusarniaatitsisoqassaaq, arfininngorpallu Qasigiannguani taamaaliortoqassalluni. Sisimiuni, Aasianni Ilulissanilu tusarniaatitsisoqareersimalerpoq.