Cairn Energy qilleriffissanik pissarseqqippoq

Uuliasiorniarnermi qinnuteqartut ilaasa, tassalu Encana-p, qillerinissanut akuersissutai marluk, Cairn Energymit qaammammi uani pissarsiarineqarput.
Allattoq Noah Mølgaard
januaarip 27-at 2011 10:37

Qilleriffissat marluk, aappaa Aammiup avataaniiittoq, aappaalu Nuup avataaniittoq, Cairn Energymit maanna akisussaaffigineqalerput. Qeqertarsuup avataaniittut blokkit marluk uuliasioqatigiiffiup maannamut qilleriffigereerpai. Taama Cairn Energy ilisimatitsivoq.

Cairn Energyp qillerinissamini imartaq 102.000 kvadrat kilometerisut annertutigisoq maanna akisussaaffigilerpaa.

Blokkini taakkunani uuliamik nassaartoqassappat, NunaOil-ip iluanaarutit 12,5 procentii pissarsiarisussaavai.

Qeqertarsuup avataani misiliilluni qillerinerni, Cairn Energy-p gassit assigiinngitsut marluk uuliallu assigiinngitsut pingasut nassaarai.

- 2010-mi misiliilluta qillerinitsinni inernerit nuannaajallannarput. Siunissami qillerinitsinni pilersaarutigaarput, katersivinnik imminut akilersinnaasunik pilersitsiniarluta, Cairnip pisortaanera Bill Gammel tusagassiuutinut nalunaarummini oqarpoq.

Cairn Energy-p 2011-mi pilersaarutigaa, qillerinerit piffinni assigiinngitsuni sisamani pissasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq