Cairn aktienik tunisaqalerpoq

Cairn Energyp Indiami immikkoortortaqarfimmi 51 procentia, tuluit piginneqataaffiannut Vedanta Resources-imut 9,6 milliard dollarsilerlugu tuniniarniarlugu augustimi siorna aalajangerpaat. Aningaasallu taakku Nunatsinni Cairn Energyp uuliasiornissaminut atortussaassavai.

Niueqatigiinniarnerli taanna kinguarsarneqarsimagaluarpoq, sapaatillu akunnerini kingullerni isumaqatigiinniarnerit kipiluttunarsisimagaluarlutik. Niueqatigiinniarnermi Indiami oqartussat piumasarisimavaat isumaqatigiinniarneq iluatsissappat iluanaaruteqartariaqarlutik.

Cairn Energyp Indiami suleqataata, naalagaaffimmit piginneqataaffigineqartup maanna akissaajaatit tamaasa akilersorpaat, naak piginneqataanertik 30 procentiinnaagaluartoq.

Tamannalu pillugu Indiami oqartussat maanna piumasaraat, siunissami akissaajartoqassatillugu akissaajaatit avinneqartassasut. Tamannali Cairnimit aamma Vedanta Resources-imit isumaqatigineqanngilaq.

Tusakkat kingulliit ersersippaat, Indiami oqartussat piumasaqarnertik unitsissimagaat, iluanaarutitaqanngitsumillu niuerneq naammassineqassasoq akuerisimallugu.

Cairn Energyp maanna naatsorsuutigaa isumaqatigiinniarnermut piffissaliussaasoq, tassalu 15 april nallertinnagu, isumaqatigiissut atsiorneqarumaartoq.