Børnehaveni misilitsittalissapput

Meeqqat meeqqerivimmiittut qanoq ilinikkut meeqqat atuarfiannut piareersarneqartarsinnaanissaat takorloorneritsik, ilinniartitaanermut naalakkersuisup Palle Christiansenip nassuiaateqarfigaa.

- Meeqqat meeqqerivimmiitsillutik piffissani aalajangersimasuni pingasuni misilitsinneqartalissapput. Meeqqat atualernissartik sioqqullugu qanoq piukkunnartiginersut paasiniarneqartalissaaq, misilitsinnerillu sapernarnavianngillat, Palle Christiansen oqarpoq.

Meeraq sutigut ikiorserneqartariaqarnersoq misilitsinnikkut paasiniarneqarpoq, meeqqerivimmiit atuarfimmut ikaarsaarnermi suut piorsarneqartussaanersut paasiniarneqarluni.

Siunnersuut partiinit tamanit tunngaviusumik tapersersorneqarpoq, suliarli kommuninit kivinneqartussaammat aningaasat aamma malitsinneqartariaqartut Siumut isumaqarpoq.

Meeqqeriviit ukiumut sisamariarlutik alakkarterneqartassapput, taakkunani ataasiarluni siumut nalunaaqqaarani alakkarterisoqartassalluni.
Kommunillu suliamik taassuminnga nammakkerneqassappata aningaasalissutissat aamma eqqarsaatigineqartariaqartut Siumut isumaqarpoq.

- Kommunit aningaasatigut ajornartorsiuteqareersut ilisimareerpavut, naammattusaariniarsarinerat aamma nalunngereerparput. Inatsit allannguuteqartillugu kivitsisuusussanut apuunneqarnissaa pingaaruteqartuuvoq, kommunillu suliassaq taanna kivittussaavaat, taamaattumik aningaasatigut kommunit taassuma suliassap kivinnissaannut tunngavissinneqarnersut apeqquserpavut. Ataatsimiititaliamilu tamanna oqaluuserissagipput pissusissamisoortoq oqaatigaarput. Inatsit tamanut iluaqutaasumik aporfissiisuunngitsumillu inerneqassappat tamanna pissusissamisoorpoq, Siumup siulittaasua Aleqa Hammond oqarpoq.

Ilinniartitaanermulli naalakkersuisup Palle Christiansenip tamanna ima akissutissaqarfigaa.

- Meeqqeriviit arlallit misilitsitsereersimasut alakkartereerpavut, taakkualu oqaatigaat misilitsinnerit ajornanngittuaraasimasut, sulisullu iluaraat, taamaammat meeqqerivinnut allanut atuutilersinnissaat tulliuppoq, Ilinniartitaanermut naalakkersuisoq Palle Christiansen oqarpoq.

Meeqqat suli atualinngitsut perorsaanikkut inerikkiartuutaasunik ulluunerani neqerooruteqarfigineqarsinnaanissaat pillugu siunnersuut aappassaaneerneqannginnermini Inatsisartut Ilinniartitaanermut ataatsimiititaliaanni suliareqqaarneqartussanngortinneqarpoq.