Buttenschøn: Innarluutillit aamma atoqateqarsinnaatitaasariaqarput

Innarluutilinnik paaqqinnittarfinni ilisimaneqarpoq sakkortusaarnerit amerlaqisut kinguaassiuutitigut kajumissuteqalernermik pissuteqartartut.

Innarluutilik qanoq ikiorneqarsinnaanersoq pillugu, ulloq unnuarlu angerlarsimaffinni allanilu innarluutilinnik sullissivinni sulisut 38-it ulluni pingasuni pikkorissarput, ullumilu naggataarput.

Nuummi utoqqaat illuanni peqqissaasutut sulisoq Aima K’ujaukitsok’ oqarpoq, pikkorissarnerminni sammineqartoq suliaminnut assut pingaartuusoq:

- Eqqarsaatigissagutsigu ilaa inuit sullippagut. Qanimut qanilaartorujuusarpagut, taava sulinitsinni naapitaqarsinnaavugut soorlu attuualaarinerit, qanilaarnerit assigiinngitsut ajornartorsiutaasinnaasut. Tussanga najugaqartumut sullitatsinnut imaluunniit uagut sulisuusugut aamma attortittarpugut inuttut.

Aima K’ujaukitsok’ aamma oqarpoq attuualaariniarnerit allaallu ilaanni sakkortusaarnerit ulloq unnuarlu angerlarsimaffinni allanilu innarluutilinnik sullissiviusuni sulisunit nalaanneqarsinnaasartut.

Pisut ammasumik oqallisigineqartalernissaat pikkorissarnermi siunertaavoq:

- Innarluutillit inuttulli allatut pisinnaatitaaffeqarnerat allaat Naalagaaffiit Peqatigiit aalajangersagaanni allassimasuutigineqarpoq. Taamaattumik innarluutillit inuttulli allatulli siunnersorneqarlutillu pisariaqartitamikkut ikiorsertariaqartut,

pikkorissartitsisoq Jørgen Buttenschøn oqarpoq.

Jørgen Buttenschøn atoqatigiinnermut tunngasunik immikkut ilinniagaliuvoq (sexolog) saniatigullu perorsaasunik, peqqissaasunik allanillu sullitalinnik timimikkut tarnimikkullu innarluutillit atoqateqarsinnaatitaanerannut tunngasunik ilinniarfimmik pilersitsisimalluni.

Pikkorissaanermini pinnguaatit, sungiusaatit, spillit, videot, atuakkat, atortorissaarutit allallu kinguaassiuutitigut atoqateqarnermut tunngasut ilinniutigisinnaasat takutissorpai.

- Innarluutillit inersimasunngortut pineqartillugit peeraqartarnermik ilinniartitsinissaq innersuussutigisarpara. Tassani innarluutillit innarluutileqatitik naligalugit naapeqateqarsinnaanerat pingaartinneqassaaq.

- Annertuumik innarluuteqartut aamma pineqartillugit, ilaanni assersuutigalugu arnaq angulluunniit qanoq nammineq tissassarsinnaaneranik ilinniartitsinneqartariaqartarpoq, taamaaliortoqassatillugu ilinniusiat atorluarneqarsinnaasartut, Jørgen Buttenschøn oqarpoq.

Aamma pingaartuusoraa Kalaallit Nunaata innarluutilinnut atoqatigiinnermut tunngasunik ilinniartitsisinnaasunik peqalernissaa.

Nuup Kommuneata pikkorissaaneq aaqqissuussaraa, sinerissameersullu Uummannamit tunu tikillugu aggerfeqartut 13-it ilanngullugit 38-it pikkorissaqataapput.

- Pikkorissarnitsinni ilikkakkakka amerlangaarmata soorlu nalornissuteqarnanga sassarsinnaangorpunga immaqa suleqatinnut, Aima K’ujaukitsok’ oqarpoq.

Assersuutigaa najugaqartoq atoqateqartarnermut tunngassutilimmik ajornartorsiuteqalerpat suleqatillu eqqartorneqatigiinnissaat pisariaqartoq.

- Soorunami inatsiseqarpoq assigisaanillu, tamaasa taakku attattussaavagut, kisianni aamma sulisut akunnitsinni suleriaaserput eqqarsaatigissagutsigu, ataatsimoorluta eqqartorutsigu pitsaassaaq. Qanoq iliorsinnaavugut, suna inerteqqutaassua, suna inerteqqutaassanngila? Assersuutigiinnarlugu.

Aima K’ujaukitsok’ aamma oqarpoq, Nuummi innarluutilinnut politikkeqarnerata saniatigut aamma atoqateqarnermut tunngasumik politikkeqalernissaq pingaartuusoq, taamaattumik suliffimminnut uteriarunik malittarisassanik allassimasunik peqalernissaq siunertaralugu naapeqatigiittarniarlutik isumaqatigiinnerarput.