Buship uuliasiulernissaq siunniuppaa

Benzinap 4 literiunngitsulluunniit aatsaat taama akisutigilerluni 20 koruuneqalernera amerikamiunut amerlanerussuteqartunut Bushimut isumaqataalernerannik kinguneqarpoq.

Bushi inatsisartuni ullumi oqalugiarnermini oqarpoq imartaminni uuliasiortariaqalerlutik. Taamaalilluni præsidentissatut qinigassanngortittoq, John McCain, ippassaq assigusumik saqqummiussisoq Buship isumaqatigilluinnarpaa. Taamatut siunniussaqarneq aningaasaqarnerup tungaatigut allatigullu politikkikkut sunniuteqartussaavoq. Isumannaallisaanissamut politikkikkut sunniuteqassaaq, USA-p kangiani qiterlermiit uuliamik pisariaqartitsinera annikillisinneqassammat, aningasaqarniarnermullu aamma sunniuteqassaaq, amerikamiut namminneq uuliamik qalluileraluarunik uuliap akikinerulerneranik tamanna kinguneqartussaammat.

Illuatungiliuttut nalunaarput uuliaatileqatigiiffissuit uuliasiorfissarujussuarnut akuersissutinik tunineqareersimasut, ilaasalu imartamik mingutsinneqarnissaa annilaanngatigigamikku akerliupput, sulilu ilaat akerliupput isumaqaramik allatut nukissioriaatsit inerisarneqartariaqartut.

Republikanerit præsidentinngorniartitassaat, John McCain, Bushimut isumaqataavoq. Avatangiisinik mingutsitsinnginnissaq McCainip manna tikillugu tapersersoraluariarlugu, Alaskami uuliamik qalluilernissaq periarfissatut manna ilaatigut taasalerpaa, naak tamaani avatangiisit paariniarlugit nuna eqqissisimatitaagaluartoq.