Buship qujaniarluni Fogh sianernerfigaa

USAmi præsidentiunnaalersup George W. Buship præsidentiunermini ullut kingulliit atorlugit ikinngutigisaminut qujaniarluni oqarasuaatikkut sianeqattaarpoq.
Allattoq Jaaku Lyberth
januaarip 19-at 2009 17:24

Danskit statsministeriat Anders Fogh Rasmussen George Bushimit aamma sianerfigineqarpoq. Præsidentip illorsuanit Det Hvide Husimit nalunaarut malillugu, George Bush suleqatigiilluarsimaneq pillugu qujassuteqarpoq nulianilu Laura tikilluaqqusaasarsimanertik aamma qujassuteqarfigalugu nutaarsiassaqartitsivik Ritzau taamatut allaaserisaqarpoq.

George Bush USAmi præsidentinngorpoq ukioq 2001 ukioq taanna Anders Fogh Rasmussen Danmarkimi statsministerinngormat. George Bush aamma Anders Fogh Rasmussen illersoqatigiinnikkut qanittumik suleqatigiipput.

George Buship pinerliiniartunut sorsunneranik Danskit statsminister-iata isornartoqartitsinngingajavilluni tapersersorpaa. Anders Fogh Rasmussen George Bush-ilu katillugit arfineq pingasoriarlutik naapipput. Aappariit taakkua marluk kingullermik naapipput siorna Bushikkut nunaataanni Crawfordimi Texasimiittumi. USAmi præsidentit illorsuat Det Hvide Hus George Buship aqagu qimassavaa, USAp oqaluttuarisaanerani præsidentiusimasuni nuannarineqannginnerpaajusimalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq