Buship naalakkersuisui qularnartoqartippaat
Sakkutuunut Iran Irakimi sakkulersorlutik akersuuttartunut USA sakkunik pilersuisuunerarlugu pisuutippaat sakkullu amerikamiut sakkutuuinut saassussinermi atorneqartarnerarlugit. Kisianni USA-mi Demokratit nuimanerusortaasa Buship naalakkersuisuisa pissusilersornerat qularnartoqartippaat. Amerikamiut Iranimut saassussinissaat taakkua ernumanartoqartippaat.
Amerikamiut immikkut ilisimasallit pingasut qaartartut assigiinngitsut pingasut sorsunnermi atorneqartartut saqqummiuppaat.
Immikkut ilisimasallit taakkua kikkuunerminnik oqaatiginnikkusunngitsut oqaatigaat, sakkut tamakkua Iranimi suliaasut, Irakimi shia-muslimit sakkulersorlutik akersuuttartuinut tunniunneqartartut. Sakkut taakkua amerikamiut aamma irakimiut sakkutuuinut saassussinermi atorneqartarnerarpaat.
Immikkut ilisimasallit aviisiliortunit assilineqarusunnatillu videoliarineqarusunngillat aamma sakkut eqqartukkamik assilineqarnissaat kissaatiginngilaat. Taamaattorli oqaatigaat sakkut Iranimi naalakkersuinikkut qullersaasup sakkutuuinit immikkut sungiusakkanit Irakimut eqqunneqartartut.
Iranimiut pisuutitsinerit ilumuunnginnerarpaat, uppernarsaatillu tamanut saqqummiunneqarnissaat piumasaralugu.
Aamma sakkutuut saqqummiussaat Amerikami ilaatigut upperiumaneqanngillat. Demokratit nuimasortaasa Iranip Irakimi peqqarniisaarniarnermut akisussaatinnissaanut Bush mianersoqquaat.
Demokratit nuimasortaasa ilaat senator Chris Dodd oqarpoq, Buship naalakkersuisuisa Irakimik saassussinissartik anguniarlugu uppernarsaatissanik salluliuuteqartarsimasut. Massakkullu uppernarsaatitut taaneqartut Bagdadimeersut upperiuminaatsikkini.
Chris Dodd isumaqarpoq Iran arlaatigut Irakimut sunniuteqartoq. Taamaattorli USA Iranimut saassussinissaminut patsisissarsiuinnarsoralugu pasinartoqartikkini.
- Tamanna USA-mut kukkunerujussuussaaq, senator Chris Dodd oqarpoq.
