Buship aningaasaqarneq silap pissusaanit pingaartinneruaa
Washingtonimi silap pissusaa pillugu naalakkersuisutigoortumik ullumi ataatsimiinnermi præsident Bush oqarpoq, aningaasaqarniarnerup ilorraap tungaanut ingerlannissaata aallunneqarnissaa, silap pissusaata ajornartorsiulersitsinerata iliuuseqarfiginissaaniit pingaarnerusoq.
Bushi aamma kaammattuivoq nunat tamat aningaasateqarfissaannik pilersitseqqullugit, avatangiisinik mingutsitsinngitsunik teknologip piorsarnissaanut aningaasaliisartussamik.
Maluginiarneqarpoq Buship nassuerutigimmagu silap pissusaata allanngoriartornera ajornartorsiulersitsisoq, allanngoriartorneralu inuit mingutsitsinerannik pissuteqartoq, oqarlunilu nunat mingutsitsinerpaat mingutsitsinertik annikilliniarlugu suleqatigiittariaqartut, nunalli tamat isumaqatigiissusiorlutik gassinik silamik kissakkiartortitsisunik mingutsitsinermik annikillisaaniarnerat isumaqatiginagu. - Nunat ataasiakkaarlutik immikkut mingutsitsinerminnik annikillisaaniarlutik namminneq iliuusissatik aalajangersaaffigissavaat assigiimmilli nunat tamat anguniagaqartariaqartariaqarput, Bush oqarpoq. Isertuunneqarsinnaanngilaq nunarpassuit naalakkersuisuisa Buship politikkia isorigaat, ullumilu ataatsimiinnermi nunat isumaqatigiikkunnaarsinniarsarigai. Taamaakkaluartoq nunanit assigiingitsuniit Buship periusaa isumalluarnartortaqarsinnaasutut isigineqarpoq, Kina Indialu mingutsitsinerminnik annikillisaanerulersinnaaqqullugit sunnersinnaammagit.
USA-p nunanut allanut ministeriata, Condoleezza Rice-p silap pissusaata allanngoriartornerata akiorniarnera, ajortumeerinianut sorsunnermut assersuuppaa, tamannalu qallunaat avatangiisinut ministeriata Connie Hedegårdip nuannaarutigaa.
- Nalunngilarput Buship ajortumeerinianut akiuiniarneq qanoq pingaartitsigigaa, maannakkullu Buship naalakkersuisuisa silap pissusaa taamak pingaartigisutut isigilermassuk, aappaagu qanoq iliuuseqarsinnaasimanani oqaannarsinnaajunnaarpoq. Silap pissusaata allanngoriartornerata akiorniarnissaanik Bushi aallussinerusariaqalerpoq, Connie Hedegård Ritzauimut oqarpoq.
