Bush ulluni marlunni ataatsimiilerpoq
USA Irakimut qanoq pissanersoq kingumut nalilersoqqinniarlugu USA-p præsidentiata, George W. Buship, ulluni marlunni ataatsimiinnissaa ullumi aallartissaaq. Irakimi ministeriunerup, Nuri al-Makikip, Irakimi naalakkersuisunngorlaat inuttalersorneri sapaatip-akunnerani kingullermi naammassimmagit, Bush taama ataatsimiititsiniarpoq.
Irakimi pissutsit oqaluuserissallugit præsidentip suleqatini qaninnerit nunaannarmi aasarsiortarfimmini, Camp Davidimi, ulluni marlunni ataatsimeeqatigissavai. Irakimi naalakkersuisut oqarasuaatikkut aamma ataatsimeeqataassapput.
USA-p Irakimi sakkutuuisa naalagaanersaata, George Caseyp, ippassaq oqaatigimisaarpaa, Irakimi pingasunik ministerinngortitsinerup Irakimi sakkutuut USA-meersut ikilisinneqarnissaat ammaakkaa.
Irakimi isumannaallisaanermut siunnersorti naapertussagaanni, sakkutuut pingajorarterummik ukioq manna naatinnagu ikilisinneqarsinnaapput, sakkutuullu nunanit allaneersut tamarmik Irakimiit 2008-p qiteqqunnerani aallarareersimassapput.
Præsidentip illorsuani atorfillit taamaattoq ippassaq piumasaraat, Amerikamiut Irakimi sakkutuuisa amerlassusaat uani ataatsimiinnermi aalajangerneqassanngikkallartoq.
