Bush silaannaq pillugu tatineqarpoq
Silaannaap allanngoriartornera pillugu Naalagaaffiit Peqatigiit Canadami ataatsimeersuartitsineranni isumaqatigiinniarnernut, USA-mi naalakkersuisut aserorterinerat unitsitteqqullugu, USA-mi senatorit 24-it præsident George Bush-imut maanna piumasaqarput.
Senatorit 24-it piumasaqartut Demokraatiullutillu Republikaaneriupput, taakku Præsident George Bush-imut naalakkersuisuinullu inatsipput silaannap allanngoriartorneranut unikaallatsitsiniarluni isumaqatigiinniarnernut aserorteriunnaaqqullugit.
- Soorlu nalunngereerit inuit pilersitaannik silaannaap allanngoriartornera kingunerilu nunarsuatsinni maanna ajornartorsiutaanerpaanngorput, senatorit Bushimut allakkaminni taama tunngavilersorput, senatorit allagaanni atsioqataasimalluni USA-mi præsidentiusimasup Bill Clintonip nulia senator Hillary Clinton Demokraatineersoq.
Silaannarmik mingutsitsinerup unikaallatsinnissaanik isumaqatigiissummut USA atsioqataareerpoq tamannalu eqqortinneqartariaqalersoq senatorit præsidentimut erseqqissaapput.
USA-mi naalakkersuisut malunnaatilimmik piaartumik iliuuseqarnianngippata Canadamilu isumaqatigiinniarnernut aserorterinertik unitsikumanngippassuk, taava USA-mi kongressi iliuuseqartariaqalissasoq, senatorit siorasaaripput.
