Bush sakkortuumik piumaffigineqarpoq
USA-mi suliffeqarfissuarni pisortat pissaanillit ataatsimoorlutik præsident Bush, unnuaru nuna tamakkerlugu oqalugiarnissaa sioqqullugu, allaffigisimavaat.
Taakkua USA-p silaannaap allanngoriartorneranut iliuuseqanngippallaarnera ernummatigaat præsidentilu piumaffigalugu, gassit silaannarmik kissakkiartortitsisut aniatinneqartartut killilersimaarneqarnissaannik pimoorussilluni anguniagaqartoqaleqqullugu.
Allaanngilaq Amerikami suliffeqarfissuit avatangiisinut tunngatillugu ernumassuteqaleriataarsimasut. Aamma præsidentimut oqariartuutaat paatsuugassaanngilaq: Gassit silaannarmik kissakkiartortitsisut aniatinneqartartut killilerneqartariaqarput! Aammattaaq oqaatigaat 2050-imi gassinik taamaattunik aniatitsineq 60 procentimik minnerulersinneqartariaqartoq.
Suliffeqarfissuit pisortaasa aammattaaq anguniarpaat USA-mi naalagaaffiit akornanni assigiinnerusumik malittarisassiornissaq. Tassami naalagaaffiit ullumikkut assigiinngeqisunik periuseqarmata.
Præsidentip illorsuanit oqaaseqartitaq nalunaarpoq, præsident Bush unnuaru nuna tamakkerlugu oqalugialeruni nukimmik atuinermik ileqqaarnissaq aamma gassit silaannarmik kissakkiartortitsisut pillugit pingaarutilimmik nalunaarutissaqartoq. Kisianni gassit silaannarmik kissakkiartortitsisut pillugit pisussaaffiliisoqassanngitsoq oqaatigineqarpoq.
Præsident Buship siorna oqalugiaammini nukissiorneq aamma silaannaap pissusaanut tunngasut tupaallaatigineqartumik eqqartorpai. Ilaatigut USA tassaanerarpaa uuliatuumasoq uuliamik pinngitsuuisinnaanngitsoq atuineralu millisarneqartariaqartoq.
Aamma nukissiuutinik allanik mingutsitsinnginnerusunik ilisimatusarnermut aningaasaliisoqarnissaanik neriorsuivoq. Kisianni avatangiisit pillugit suliniaqatigiiffiit susoqarsimannginnerarlugu uparuaapput. Siorna aamma oqalugiareernerata kingornagut Demokratinit isornartorsiorneqarpoq nukissiuutinik allanik ilisimatusarnissamut senatimit aningaasaliissutigineqartut atorsimanngimmagilluunniit.
Bush nuna tamakkerlugu oqalugiaraangami nukissiuuteqarneq avatangiisillu pillugit oqaaseqartarpoq, kisianni oqaasii kinguneqartannginnerarlugit isornartorsiorneqartarpoq.
