Bush: -Saddamip toqunera inuunermi pingaarutilittut taasariaqarpoq

Irak-imi kisermaassilluni naalakkersuisuusimasoq 69-inik ukiulik Saddam Hussein arfininngornerup unnuaani toqutaavoq. Nunatta nalunaaqutaa naapertorlugu Saddam Hussein unnuap-qeqqarluinnaliivissoq qimillugu toqunneqarpoq.

- Saddam Hussein ingerlaannaq toquvoq, pisortatigoortumik toqunerani isiginnaartuutitat ilaat taama oqarsimavoq.

Takunnittut oqaluttuaraat Saddam Hussein toqutaalerami eqqissisimasimaqisoq toqutaannginnerminilu guutiminut qinoqqaarsimasoq.

Saddam Husseinip toqutaanera arabiami inuppassuarnit kamaatigineqaqaaq ingammik kamaatigineqarluni ullormi muslimit illernartutut isigisaanni toqunneqarnissaa ullulerneqarsimammat.

Danmarkimi ministeriunerup Anders Fogh Rasmussenip kisermaassilluni naalakkersuisuusimasup pinerluutigisimasai assuarai, kisiannili illuatungaatigut erseqqissaatigaa Danmarki toqumut pillaasarnermut akerliummat.

USA-p præsedentiata Buship Saddam Husseinip toqutaanera ”inuunermi pisutut pingaarutilittut taavaa” taamaalilluni taassuma toqunera Irakip nunatut inuit tamat oqartussaaqataallutik ingerlaqqinnissaannut aqqutissaqalissammat.

Tuluit ministeriunerata Tony Blairip iluarisimaarpaa Irakimi eqqartuussiviup Saddam Husseinip ajorluinnartunik ajortuliarisimasai minnerpaannguanut allaat tamaasa qaqilerlugit eqqartuussimammagu.