Bush naammagisimaarinnippoq

oktobarip 31-at 2006 15:30

Korea Avannarlermiut atomip nukinganik atuiniarnertik pillugu isumaqatigiinniarnernut ilannguteqqikkumalermata, præsident George Buship naammagisimaarpaa. Taamatullu pisoqarnera George Buship angusaqarsinnaanerminik takutitserusuleruttornerani pivoq, Amerikami inatsisartunut qinersinissaq novembarip arfineq-aappaani pisussaq sioqqullugu.

Korea Avannarlermiut atomip nukinganik atuiniarnertik pillugu nunanut eqqaamiuminnut USA-mullu isumaqatigiinniarumalernerat, Kinamiit nalunaarutigineqartoq, tupaallaatigineqarpoq.

- Tamanna nuannaajallaatigara Kinamiullu qutsavigerusuppakka isumaqatigiinniarnerit aallarteqqissinnaalernerat angusimammassuk, George Bush ualimut naatsumik taama oqarpoq.

Isumaqatigiinniarnerit aallarteqqissinnaalernerannik isumaqatigiinniarneq pisimavoq Kinamiut, Amerikamiut Korea Avannarlermiullu atorfilittaasa qulliunerusut Kinami illoqarfiit pingaarnersaanni isertortumik oqaloqatigeereersullu.

Korea Avannarlermiut misileraallutik atormimik qaartitsereersullu nunarsuarmioqatigiinnit Korea Avannarlermut pillaaniutitut suliniutit aallartinneqarput.

Korea Avannarliup piumasarisimagaluarpaa USA-mut toqqaannartumik isumaqatigiinniarnissaq. USA-lli isumaqatigiinniarnermi nunat Korea Avannarliup eqqaamiuisa ilaatinneqarnissaat piumasariuarsimavaa.

Korea Avannarlermiut isumaqatigiinniarumalernerat Bushimut nuannersuuvoq, tassami novembarip arfineq-aappaani USA-mi Inatsisartunut qinersisoqartinnagu karakterbogiminut kusassaataasinnaasunik amigaateqaleruttortoq nalunaarut tutsiuppoq. Tassami qinersinermi præsidentip partiia ajorsassangatinneqarmat.