Bush naaggaarniarpoq
Amerikami præsidenti George Bush, ullumi oqarpoq, Amerikamiut sakkutuuisa Irakimiittut qaammatit aqqanillit ingerlaneranni angerlarartinneqarnissaannik Inatsisartut aalajangiinerannut naaggaarsinnaatitaanini atorniarlugu.
USA-mi Inatsisartuni aalajangiinermi ilaatinneqarput Irakimi Afghanistanimilu sakkutooqartitsinermut atugassat 550 milliard koruuniusut, tamatumunnga ilaatinneqarluni qaammatit aqqanillit ingerlaneranni sakkutuut Irakimiittut angerlarartinneqarnissaat.
Kisianni Buship inatsit ulluleereerluni angerlarartitsinissamik imalik atsiorusunnagu ullumi nalunaarutigaa.
Buship isumaa naapertorlugu ulluleereerluni angerlarartitsiniarneq USA-p akeraanut akiuutiinnarnissamut kajumissaarutaassaaq. Taamaattumik naaggaarsinnaatitaanini atorniarpaa. Tassa præsidentiunermini aatsaat aappassaa immikkut pisinnaatitaaffini taanna atorniarpaa.
USA-mi Inatsisartuni aalajangiineq naapertorlugu Buship sakkutuunik angerlarartitsineq ukiormanna oktobarip aallaqqaataani aallartissavaa sakkutuullu amerlanerpaat aappaagu apriilip aallaqqaataani angerlarartinneqareersimassapput.
