Bush Korea avannarlermiullu isumaqatigiissuteqarput

Præsident Buship ukiormanna tusagassiortunik katersortitsinini siulleq naammasseqqammerpaa.

Korea Avannarleq pillugu isumaqatigiissummut tunngatillugu isornartorsiuisut akerlilerpai. Tassa isumaqatigiissummi pineqarmat Korea Avannarlermiut atomimik atuinissamik pilersaarutaasa unitsinneqarnissaat, taarsiullugulu aningaasatigut uuliamillu ikiorserneqarnissaat, ilaatigut USA-mi talerperliunianit isornartorsiorneqartoq. Isumaqatigiissut naalagaaffiit akornanni iluatsittumik oqaloqatigiittoqarsinnaaneranik assersuutissaalluartutut Buship oqaatigaa.

Bush aperineqarpoq sooq Iranimut isumaqatigiinniarusunnginnersoq. Tamatumunnga Bush akivoq massakkut Iranip isumaqatigiinniarneqarsinnaanera ilimaginngikkini. Peqatigitillugulu oqarluni massakkut Europamiut, Russit Kinamiullu Iranimut qanoq pissuseqartoqarnissaa pillugu isumaqatiginiarneqartut.

Aamma Iranimiut Irakimut sakkunik eqqussuisuusut qularutiginnginnerarpaa taamalu narrutsannartumik taama oqalunnerit asuli pisuutitsiniaannarluni oqalunnerunerarlugit pasilliinerit ilumuunnginnerarlugit.

Kingulliullugu Irak USA-milu inatsisartut eqqartorpai. Inatsisartut maanna Demokratinit amerlanerussuteqarfigineqartut qinnuigai aningaasaleeqqullugit, taamaalilluni sakkutuunik amerlanerusunik Irakiliartitsisoqarsinnaaniassammat, tamannami USA-mi inatsisartut maanna akornusernialermassuk. Inatsisartut qinnuigai Irakimut periaaseq nutaaq periarfisseqqullugu, tamatuma kingorna qanoq iliortoqarnissaa aalajangiiffigineqarumaarmat.