Bush isumaqatigiinniartariaqalerpoq
USA-p præsidentiata, George W. Buship, siunissami inatsisiliornissaq pillugu Demokratit maanna isumaqatiginiartussanngorpai. Inatsisartunut qinersinerup kingorna tamanna paasinarsivoq, naalakkersuisunummi illuatungiliuttut Demokratit, ukiut aqqaneq-marluk ingerlaneranni, innuttaasut sinnerlugit sinniisoqarfimmi, tassa Repræsentanternes Husimi, inatsisartut ataatsimiittartoqatigiivini aatsaavissuaq amerlanerussuteqarlutik inissanut marlunnut isermata.
Senatimi inissani untritiliusuni inissat 51-it Demokratit tupaallannaqisumik pissarsiaraat, tassa naalagaaffimmi Virginiami, 2,3 millioninik qinersisartoqartumi, demokratit qinigassanngortitaat 7.000-nik amerlanerussuteqaqqalaarluni ajugaammat. Virginiami maanna kisitseqqissaartoqartussanngorpoq. Naalagaaffimmi Montanami qinersinerup inerneri suli imminnut qaninnerupput. Demokratimmi tamaani qinigassanngortitaat taasinernik 5.000-iinnarnik amerlanerussuteqarpoq.
Demokratit ajugaanerisa kingunerissagunarpaa Irakimi sorsunnermut iliuusissanik qinersinerup allanngornissaa. Irakimi sorsunneq qinersinerup nalaani annertuumik isornartorsiorneqarpoq, Demokratillu ajugaanerisa qulakkeerneqarnerata kinguninngua illersornissamut ministeri, Donald Rumsfeld, tunuarpoq. Donald Rumsfeldip kingoraartigissavaa naalagaaffiit isertortumik paasiniaasartuini, CIA-mi, siusinnerusukkut pisortaasimasoq, Robert Gates – tassa tamanna Senatimit akuerineqassappat.
