Bush Diaavulutut taaneqarpoq
USA-p præsidentia George W. Bush, Naalagaaffiit Peqatigiit ataatsimiinnerata nalaani, Venezuelap præsidentianit Hugo Chavez-imit diaavulutut taaneqarpoq.
- Diaavulu ippassaq maaniippoq. Ikuallassaat suli naamasinnaavara, FN-ip ataatsimiittarfianni oqaluttarfimmiit oqalugiartilluni Hugo Chavez oqarpoq.
USA-p nunanut allanut ministereqarfiata oqaaseqartartua pakatsisimavoq politikeri nuimasorsuaq taamatut oqalussinnaammat.
Nunatta nunanut allanut tunngasunut naalakkersuisua Josef Motzfeldt kiisalu inatsisartunut ilaasortaq Palle Christiansen FN-ip ataatsimiinneranni peqataapput, Chavez-illu oqalugiataa tusaasimassagunarlugu.
FN-ip ataaatsimiinnerata nalaani sammineqartussat ilaat nunatsinnut pingaaruteqartutut nalilerneqarsinnaavoq, tassami nunap inuiisa pisinnaatitaaffiisa pillugit siunnersuisoqatigiit ataatsimiinnermi saqqummiussisussaapput.
