Burmami innuttaasut akerliussutsimik takutitsinerat , nunatsinni aammattaaq malinnaavigineqarpoq

- Isumaqarpunga kikkut tamarmik annilaangassutigigaat sakkutuut innuttaasunik toqoraalernissaat, kiisalu suli annilaangassutigineruaat mattuttunik toqoraasoqalernissaa.
septembarip 28-at 2007 14:52

Igasut pisortaat Nuummi neriniartarfimmi Pregomi, Kiangkai Inthawong, Burmami akerliussutsimik takutitsineq aallartimmalli nittartakkakkut kiisalu CNN-ikkut malinnaalluaqqisaarpoq, malinnaaffigai Burmami demokratiimik piumasaqarlutik akerliussutitsimik aqqusinerni takutitsisut inuinnaat kiisalu mattuttut.

- Isumaqarpunga kikkut tamarmik annilaangassutigigaat sakkutuut innuttaasunik toqoraalernissaat, kiisalu suli annilaangassutigineruaat mattuttunik toqoraasoqalernissaa.

Sakkutuut kisermaassillutik naalakkersuisut isumaqarunarput, mattuttut unitsikkunikkit aamma innuttaasut unitsinneqassasut, taamak oqarpoq Kiangkai Inthawong.

Burma inunnik 47 mio.ninik inoqarpoq, 1962 –miilli sakkutuunit nuna aqunneqalerpoq. Siornatigut akerliussutitsimik takutitsisoqaraangat inuit akerliussutitsimik takutitsisut sakkutuuninngaaniit toqorarneqartarsimapput.

Kiangkai Inthawong ukiut arfineq pingasut Kalaallit Nunaanni najugaqarsimavoq, siornatigullu Burmameersunik suleqateqartarsimalluni.

-Burmami sakkutuut pissaaneqarluarput, inuinnaallu nerisassaannik tillittarput, inuinnarnullu peqqarniitsuliortarlutik, taamak Kiangkai Inthawong oqarpoq. Taassumalu neriuutigaa akerliussutsimik takutitsineq tamatumuuna inuinnarnit ajugaaffigineqassasoq. Tassa Burmami inuttaasut demokrati malillugu inuulersinnaanerat neriuutigigamiuk.