Burmami akerliussutsimik takutitsiuarsinnarput

Akerliussutsimik takutitsinerit Burmami ullumikkut ingerlanneqaqqipput aamma pisortanit nassuerutigineqarpoq ullumikkut inuit qulingiluat toqutaasimasut – taakkununnga ilaallutik Tyskeq Japanimiorlu.

Aasiamiut suleqatigiiffianni ASEAN-imi nunanut allanut ministerit ullumi piumasaraat Burmami sakkutuut kisermaassillutik naalakkersuisuusut inuinnaat oqartussaaqataanerannik ilungersuuteqarlutik akerliussutsimik takutitsisunut nakuuserniarunnaaqqullugit.

Nunanut allanut ministerit ulluni makkunani New Yorkimi Naalagaaffiit Peqatigiit ataatsimeersuarneranni peqataapput.

Taamatuttaaq USA aningaasatigut killilersuiniarluni ullumi aalajangerpoq – maannamuugallartoq Burmami naalakkersuisunut ilaasortaasunut sammitinneqartumik.

Nunatsinni nunarsuarmilu sumi tamaani ippassarli sms-eqattaartoqalerpoq, tamatumani aqagu tallimanngornermi inuit aappaluttumik tujuuluaraqarnissaannik kajumissaarisoqarluni, inuit taamaalillutik Burmami akerliussutsimik takutitsisunut illersuinertik ersersinniassammassuk.

Danmarkimi Burmakomite-mit oqaatigineqarpoq aqagu aappaluttumik tujuuluaraqarnissamik kajumissaarut Thailandimit aallaaveqartoq.