Burka danskit atuarfiini interteqqutaalertinniarpaat
Naalakkersuisuni ataatsimiititaliap maannakkorpiaq ilaatigut burkat atorneqarnerisa qanoq killilersimaarneqarnissaat misissorpaa. Innuttaasulli apeqqut assigiinngitsunik isumaqarfigaat.
Inuit ilaasa arnat timertik tamakkerlugu assiaqutallit toqqissisimanarineq ajorpaat, inuk iluamik takuneq ajornartarmat. DR-ip misissuisitsinerata ersersippaa danskit affaasa inini kikkulluunniit katersuuttarfiini uligussap taamaallaat isit nalaasigut ammasup, imaluunniit burkap isinik assiisup atornissaasa inerteqqutaalernissaat kissaatigigaat. Burkap atorneqartarnera danskit kulturiannut atasuunngitsoq ilaat isumaqarput. Misissuineq naapertorlugu pingaartumik utoqqaat sivikinnerusumik ilinniagaqarsimasut ilinniagaqarsimanngitsulluunniit timip tamarmi ulissimanissaa akerleraat, danskillu sisamaagaangata ataatsip tamanna ajoriffissaqartinnagu, danskillu quliugaangata ataaseq nalornisarluni.
Aammataaq Frankrigimi burka oqallisigineqarpoq. Franskit inatsisartuisa nalunaarusiaanni inuit katersuuttaarfiini tamani muslimit assiaqutaqartarnerisa inerteqqutaalernissaat kajumissaarutigineqarpoq. Nalunaarusiami erseqqissarneqarpoq burka franskit pingaartillugit naleqartitaannut mitalliutaasoq.
Frankrigip præsidentia Nicolas Sarkozy tassaavoq oqallinnermik aallartitsisoq juunimi burka "tikilluaqqunagu" nalunaaruteqarami taannalu "arnanik naqisimanninnermut" ilisarnaataasoq nassuiarlugu, tamannalu nunami inuit pisinnaatitaaffii eqqarsaatigalugit siuarsimasutut imminut isigisumut akuersaarneqarsinnaanani.
