Burgerit pommes fritesillu pilerisaarutigaat
1950-ikkunni naggueqatigiit Inuit hunnorujukkaat tuberkulosertut kujammut napparsimavinnut aallartinneqartarsimapput, amerlasuut toqusimapput amerlasuullu ajorunnaarsimapput. Pisortallu sakialluut tuberkulose atugaavallaarunnaarsimasorigaluarpaat ukiorli kingulleq sakialluummik tuberkulosimik nappaalasut amerlisimapput, ingammik Nunavummi.
Nunavummi sakialluummik tuberkulosimik 2010-mi napparsimasut 100-t tikingajassimagaat, Canadap sinneranut sanilliullugit 60-eriaammik amerlanerit.
Sakialluutip tuberkulosip annertuumik atugaaneranut peqqutaasinnaasut amerlapput, inigisalli ajortut, inunnik amerlavallaanit inigineqartut isugutaqisullu sakialluutip tuberkulosip atugaaneranut peqqutaanerpaanerarneqarput. Taakkulu saniatigut Nunavummiut 70 procentii pujortartarput, sakialluutillu tuberkulosip nappaatigineqarneranut tamanna peqqutaasinnaavoq.
- 50-ikkunni pisimasup timikkut eqqarsaartaatsikkullu ajoqusernermik kingunerlutitsisimasup, naggueqatigiit inuit arfineq-marluugangata ataaseq peqqinnissaqarfimmi pisortanit sakialluummit tuberkulosimit katsorsarniarlugit kujammut aallartinneqartarsimapput, amerlasuullu nunaqarfimminnut uteqqinngisaannarsimallutik, tamannalu pillugu sakialluummut tuberkulosimut katsorsartinnissamut tatiginnittoqarani, Nunavumi peqqinnissamut isumaginnittoqarfimmi pisortaq Isaac Sobol aviisimut Global and Mailimut taama oqarpoq.
Tamannalu pillugu amerlasuut aatsaat sakkortuumik tuberkulosileraangamik katsorsartikkiartortarput, Isaac Sobol oqarpoq.
Maanna peqqinnissamut isumaginnittoqarfik sakialluut tuberkulose pillugu paasisitsiniaalluni aallartippoq, katsorsartikkaannilu nakorsaatillu atoqquneqartut atoraanni burgerinik pommes fritesinillu akeqanngitsumik pisinnaanermik allaat pilerisaarisoqarluni.
