Danmarkimi aviisi BT nunatsinni puisit amii pillugit oqallinnermut ilannguppoq, BT-milu puisit amii pillugit allakkiaq qulequtaqarpoq ”Julia puisit amii pillugit kanngunartuliami pisarineqarpoq”.
Aviisi allappoq erinarsortartoq nunatsinneersoq Julie Berthelsen puisinik tusindtilinnik piniapilunnermut ussassaarutitut inequnartutut atorneqartoq.
Aviisimi BT-mi allaaserineqarpoq nunatsinni puisinniarneq aqunneqanngilluinnartumik ingerlanneqartoq, ukiullu tamaasa puisit amiinik tusindtilinnik eqqaasoqartartoq, taassumalu saniagut puisit amii allat tusindtillit kangerlunni aamma eqqarneqartartut.
Aviisi BT aamma allappoq nunatsinni puisit neqerpassuinik eqqaasoqartartoq neriumaneqanngimmata.
- Tamakkulu tamaasa soorlu aamma nammaginagit puiserpassuit pisarineqartut kivisoorutigineqartarput, Canadamiullu biologit naapertoraanni, puisit pisarineqartut pingasuungaangata ataaseq kivisoorutaasarpoq, aviisi BT taama allappoq.
BT-p allakkiamini issuarpaa Keld Hansen, atuakkamik ”Farvel Til Grønlands Natur”-imik atuakkiortoq, atuakkap aqqa immaqa ima nutserneqarsinnaavoq, ”Kalaallit Nunaanni pinngortitamut inuulluaqqusineq”.
Atuakkiamini Keld Hansen-ip tikkuarpaa nunarput piorsarsimassutsikkut ima siuarsimatigisoq allaat inuusuttut puisiminertorujunnaarlutik burgerertorusunnerulersimasut.
Tamatuma saniatigut nunatsinni piniartut puisit amiinut tapiissutinik perusuinnarlutik puisinniartartut, aviisi BT issuaavoq.
Aviisip BT-p taama allaaserisaqarneranut Julie Berthelsen oqaaseqartissinnaasimanngilarput.