Great Greenland kalaallillu puisinniartarnerat pillugu aviisip Danmarkimi ullormut saqqummersartup, BT-p, politikkikkut akuliunnera Julie Berthelsenip soqutiginngilluinnarpaa.
Julie Berthelsen ussassaarutitut inequnartutut atorneqarnerarlugu BT allappoq, puisit tusindtilippassuit piniapilunneqarnerannut ussassaarutigineqartutut allaat nalilerlugu.
Erinarsortartoq nunatsinneersoq tusagassiuutitigut nalunaarummi ima oqarpoq:
- 20-nik ukioqarlunga taamanikkut ilinniagaqartuuvunga, Great Greenland tunuliaqutaralugu puisit amiinik atisalianik takutitsisarlunga. Kalaaliugama kalaallit suliai qaquguluunniit illersortuassavakka – politikki avaqqullugu.
Julie Berthelsen Kalaallit Meerartaannut Red Barnet-p Kattuffianni (Foreningen Grønlandske Børn)- tassani aallartitatut inissisimavoq.