BSU aqqutigalugu illusiat § 37 naapertorlugu apeqquserneqarput

Boligstøttemi aqqutigalugu illusinikut periarfissamik eqqunneqaqqissimasumut qanoq atorluaatigisimanersut Anders Olsenip apeqqutigaa. Boligstøttemi aqqutigalugu illusiat nutarsarniaraanni 100.000 koruuninnattoqarsinnaammat aningaasaliissutaasut 2,3 mio. koruuniusut ilumut naammannersut Anders Olsenip paaserusunnerarpaa.

Tassa periarfissaq qanoq atorluarneqartiginersup saniatigut aningaasat qanoq agguataarneqarsimanersut, qassit qinnuteqaamminnut akuerineqarsimanersut qassillu itigartitaasimanersut Anders Olsenip aamma paaserusunnerarlugit.

Anders Olsenimmi tusatsiakkani naapertorlugit aningaasaliissutit nungoreersimanerangaapput, innuttaasullu periarfissamut tassunga atuisinnaajunnaarsimanerangaallutik.

- Sineriammimi angalaaraangatta BSU aqqutigalugu illuliat qanganitsersimagaarmata inigineqarsinnaajunnaarsimasut siumortaannarpavut. Taamaammat BSU aqqutigalugu illuutillit nutarsaanissamik pisariaqartitsisinnaasut tapiiffigineqartarnerisa aaqqissuuteqqinneqarnissaa pissusissamisuussaaq, Anders Olsen, § 37 naapertorlugu apeqqutimini ilaatigut taama tunngavilersuivoq.