Bryggenimi 150-it qilattaallutik paffequtiliorput
Sapangaaqqat nuersagassamut ikkussuunneqarluarput. Aaqqissuussineq nuannaarutigineqaqaaq, arnallu nuersaanermik nuannarisallit 150-it nuersaajartorput.
Illu Atlantikumi strikkecafé-mik taallugu pingajussaa taama aaqqissuussisoqarpoq. Siullermik aaqqissuussinermi islandimiut tujuulussuannik nuersaasoqarpoq, aappassaanillu aaqqissuussinermi savalimmiormiut tujuululiortoqarpoq, ippassarlu tassa kalaallit tajarutaat, aamma paffequtinik taaneqartut, kalaallisuunullu atalluinnartut, nuersarneqarput.
Aaqqissuussinermi aqutsisoq, Aviaaja Kleist Burkal, tassaavoq "Tajarutit sapangaarartallit"-mik taallugu atuakkiortoq. Taanna isumaqarpoq paffequtit kingumut saqqumilaaqqilersut.
- Taamaattut sumi tamani ukiuni kingullerni sisamani-tallimani pisiassaalersimapput, soorlu aamma H&M-mi pisiassaasut. Sapangaarartalerngalli nioqqutigisartagaat tassaapput ikuseq tikinnagu qilattakkat. Tassa ukiuni kingullerni mutinngoriartuinnarput, Aviaaja Kleist Burkal oqarpoq.
Taamatut nuersaatitsisarneq nuannarineqaqisoq Illu Atlantikup ingerlatiinnarusuppaa, immaqalu sapangaaqqerinermik aamma aaqqissuussisalissalluni, suliniummi pisortaq, Asta Stefansdottir, ilisimatitsivoq.