Brugsenip ukiormannamut akissarsititassaa ualeru saqqummiunneqassaaq
Ukiormanna akissarsitinneqartussatut Brugsenimit aalajangiunneqartussaq tassaassassalluni inuk, peqatigiiffik imaluunniit suliffeqarfik "avatangiisinut tunngasunik" suliniuteqarsimasoq.
- Akissarsisitsinermut atatillugu ujartukkavut tassaassapput nutaaliortut avatangiisinillu mianerinnittut. Avatangiisinik pitsaasunik piujuaannartitsinermillu tunngaveqarluni kinguaariinnut ingerlatitseqqinnermik pingaartitsisunik ujaasivugut, pisortaq Susanne Christensen ukiup nutaap aallartinnerani akissarsisussanik ujaasisoqalermat taama oqarpoq.
Piukkussatut siunnersuutigineqartut arlaqartut
Ukiormannamut akissarsisitsinissamut siunnersuutit piukkunnaatilippassuit tiguneqarsimasut, Brugsenimi nuna tamakkerlugu siulittaasup Aalipaaraq Kreutzmannip oqaatigaa.
Kina imaluunniit kikkut avatangiisinut tunngasumik 100.000 koruuninik akissarsitinneqassanersut ualimut nalunaaqutaq pingasunut saqqummiunneqassaaq.
"Peqqinneq atuarfillu" siorna qulequtaritinneqarmata - Niaqornaarsummi Atuarfik Kristian Lundblad, nunaqarfimmi meeqqanut timikkut tarnikkullu peqqissumik peroriartortitsinissamik suliniuteqarnerannut siorna akissarsitinneqarput.