Brugsenip ilisivii imaqanngingajapput

Ilisiviit imaqanngingajannerat assigiinngitsorpassuarnik pissuteqartoq, Nuummi Brugsenimi pisortaq Kim B. Jensen oqarpoq:

- Meeqqanut tapit tunniunneqaqqammerput, aningaasallu kaaviiaartitavut amerlangaatsiarlutik. Pisiniartorpassuupput. Umiarsuullu assartuutip tikinngitsoornissaa pillugu iluamik ilisimatitiseqatigiissimannginnerput pissutaalluni nioqqutissat tigunngitsoorpavut. Erseqqissaatigissavarali Royal Arctic Line matumani pineqanngimmat, kisianni umiarsuaq pilersaarutit malillugit tikinngilaq, nioqqutissanillu amigaateqarsimalluta, Kim B. Jensen oqarpoq.

Umiarsuit angalanissaannut pilersaarusiaq nutaaq Namminersorlutik Oqartussanit akuerineqarsimasoq naapertorlugu umiarsuit ullut qulikkaarlugit tikittartussaapput, siornatigut sapaatip-akunnikkaarlugit tikittaraluarlutik.

Tamanna pisiniarfiutilinnut ajornartorsiutaasinnaavoq, Kim B. Jensen oqarpoq, nioqqutissanilli pilersuinerup aalajaannerulernissaa taassuma neriuutigaa:

- Piffissami kingullermi pissutsit atuuttut ilikkagaqarfigaavut. Umiarsuilli angalanissaannut pilersaarut maanna atuuttoq naapertuutinngilluinnarpoq, umiarsuimmi sapaatip-akunnikkaarlugit tikittarnissaat pissusissamisoornerugaluarpoq, pisisartullu eqqarsaatigalugit aaqqiivigineqartariaqarluni, Nuummi Brugsenimi pisortaq Kim B. Jensen Radioaviisimut oqarpoq.

Kim B. Jensen aamma oqarpoq, illoqarfinni allani Brugsenit nioqqutissanik pilersorneqarnerat ilaatigut ajornartorsiutaasartoq.