Brugsen: Inerteqquteqarneq iluaqutaanavianngilaq

Sodavandit imigassanik akullit tuniniarneqartarnerisa unitsinneqarnissaannik Nuup borgmesteriat Agnethe Davidsenip siunnersuutaa immini ajunngikkaluartoq Nuummi Brugsenimi sulisoq Jørgen Lyberth isumaqarpoq pisisartut ilikkareermatigit tunisaajunnaaraluarpata pisisartut imigassanik allanik kimittunernik pisiortortalissasut, taakkualu aamma allanngortinneqarnissaat pisariaqalissasoq.

Erseqqissaatigaa sodavandit imigassanik akullit saqqumisumik inissisimannginnerisa kingunerigaa tunisat appaariaateqarsimanerat.

Sodavandit imigassanik akullit Brugsenip qanittukkut neqeroorutigai, tamannalu akisussaassuseqanngitsumik tuniniaanerunnginnersoq apeqqutigineqarmat Jørgen Lyberth oqarpoq imigassatut neqerootutitut allatulli inissinneqartartut, aamma taakku neqeroorutigineqartarnerat ukiumut marlussoriaannarluni pisartoq.

Taamatulli neqeroorutigineqartarneranni immikkut qaffasissumik tunineqartarnerat takussutissaqanngitsoq erseqqissaatigaa.