Bronislaw Komorowski Polenimi præsidentitut qinigaavoq
Polenimi partiip naalakkersuisuutitaqartup præsidentitut qineqqusaartitaa, maannakkullu præsidentiugallartoq Bronislaw Komorowski, qinersivinni isumasiuinerit naapertorlugit, Polenimi præsidentissarsiorluni qinersinermi ajugaavoq. Polenimi præsidentimut qinersineq ullumikkut sapaammi ingerlanneqarpoq.
Naalagaaffiup TV-ata qinersivinni isumasiuineri malillugit Komorowski qinersisartut 53 procentiannit qinerneqarpoq, talerperliillu illuatungiliuttut præsidentissatut qinigassanngortitaat, siornatigut premierministeriusimasoq Jaroslaw Kaczynski 47 procentinit qinerneqartoq.
TV-qarfiup namminersortup TVN-ip isumasiuinerata aamma tamanna takutippaa.
Præsidentimut qineqqusaarnermi ajorsartup Jaroslaw Kaczynskip, præsidentiusimasoq Lech Kaczynski marluliaqatigivaa, taanna aapriilimi timmisartumut ilaalluni Ruslandimi ajunaarpoq. Toquneratalu kingorna ikerinnakkut præsidentissarsiorluni qinersisoqarpoq.
Lech Kaczynskip unnummut ajorsarnini nassuerutigaa.
Qinersinermi ajugaasup, Komorowskip, kissaatigaa Poleni EU-mut qaninnerulissasoq, akerlianik ajorsartoq Kaczynski EU-mut qulartuusoq.
