IA-kkut nuna tamakkerlugu weekendimi ataatsimiittoqarmat, nunanut allanut naalakkersuisup, Pele Brobergip nalunaarutigisai Naalakkersuisup siulittaasuata ilumuunnginnerarlugit oqalugiaatimini ilannguppaa.Assi: Malik Brøns

Brobergi isornartorsiorneqareersoq Naalakkersuisut siulittaasuat: Naalakkersuisut aaqqiissuteqassapput

- Naalakkersuisut, partiini tapersersortaasut illuatungiliuttullu oqariartuutai tusaavakka, Múte B. Egede oqarpoq. Tamanna Pele Brobergimut isornartorsiuisoqarneranut Atassummiillu naalakkersuisunik taarsiisoqaqqusinermut tunngasut pineqarput.  

Nunanut allanut, inuussutissarsiornermut, niuernermut silallu pissusianut naalakkersuisumut, Pele Brobergimut tatiginnikkunnaarlutik, Naalakkersuisut partiini tapersersortaanit Atassummiit ataasinngornermi oqaatigineqarpoq.

Pele Broberg nunanut allanut naalakkersuisuuginnarnissaa tulluanngitsoq, Atassummi siulittaasup, Aqqalu Jerimiassenip, KNR-imut oqaatigaa. Taasumallu Naalakkersuisut siulittaasuanut, Múte B. Egedemut, naalakkersuisut taarserneqarnissaanik inassuteqarfigaa. 

Innuttaasut nunaqavissut namminiilivinnissamut kisimi aalajangeeqqataasinnaanerannut Pele Brobergip tusagassiutimut Berlingskemut oqariartuutaa, partiit tapersersortaasunit akuerineqanngilaq.

Atassutip illuatungiliuttullu Pele Brobergimut isornartorsiuinerat Naalakkersuisut siulittaasuata, Múte B. Egedep tusaallugu, KNR-imut marlunngornermi oqaatigaa.   

- Naalakkersuisoqataasut isornartorsiutaat tusaavakka. Partiit tapersersortaasut illuatungiliuttullu oqaatigisaat aamma tusaavakka, Múte B. Egede oqarpoq.    

Inuiaqatigiinnut oqariartuutigineqartussaq utaqqeqqugaa  

Isornartorsiunerli tunngavigalugu naalakkersuisunik taamaasillunilu nunanut allanut, inuussutissarsiornermut, niuernermut silallu pissusianut naalakkersuisumik taarsiinissamut Naalakkersuisunut siulittaasup, Múte B. Egedep, suli isummerfiginngilaa. 

Naalakkersuisulli inuiaqatigiinnut piffissap ingerlanerani oqariartuutigineqartussaq utaqqeqquaa. 

- Naalakkersuisooqqatigiit akunnerminni oqaloqatigiinerat aammalu massakkut pissutsit aallaavigalugit qanoq inerlariaqqinnissartik, naalakkersuisooqqatigiillu suleriaqqinnissaat qanoq ittoq avammut nalunaarutigiumaarpaat piffissanngorpat, Múte B. Egede oqarpoq.

AAMMA ATUARUK Múte B. Egede Pele Brobergip oqaasiinut naqqiuteqartoq

Naalakkersuisut siulittaasuat nunanut allanut naalakkersuisumut, Pele Brobergimut, tatiginninnersoq aperineqarami ima akivoq:

- Tassa naalakkersuisut katitigaanerat taama isikkoqarpoq. Isummersuutit assigiinngitsut tusaavagut naalakkersuisullu akunnerminni aaqqiissutissamik qanoq iliorniarnerlutik ingerlariaqqikkumaarput.

Naalakkersuisut siulittaasuat Múte B. Egede sapaammi naqqiuteqarpoq naqissusiillunilu oqarluni nunatsinni innuttaasut inuiaassuseq aallaavigalugu assigiinngitsumik pineqarnissaat naalakkersuisut politikkerinngilaat.

”Kalaallit Nunaanni innuttaasut immikkoortinneqarnisaanut taasititsinnginnissamullu iliuuseqarnissaq Naalakkersuisut siunertarinngilaat,” ilaatigut siulittaasumiit naqqiutigineqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat