British Petroleum Savalimmiuni uuliasiorniarpoq

Uuliasioqatigiiffik BP Savalimmiut eqqaanni uuliasiorluni sapaatip akunnerani uani kingumut misiliinialerpoq.

Savalimmiut kujammut-kitaatungaanni, Williamsbrøndimik taaneqartartumi, tamatumuuna misissuisoqassaaq. 4.750 meterisut annertutigisumik qillerisoqassagunarpoq. Qillerinissaq 350 millioni koruunit missaanik akeqassangatinneqarpoq.

Tamaanili uuliamik ilumut nassaartoqassanersoq savalimmiormiut naammagittarlutik utaqqisariaqarpaat. Ilimagineqarpormi qillerineq qaammatit sisamat missaanni pissasoq.

Savalimmiut eqqaanni ukiuni kingullerni arfinilinni tallimariarluni uuliasiortoqareerpoq. Uuliasioraluarnerit susaarfiusarput, tamannalu savalimmiormiunut nikalluallannartarsimavoq, maannali isumalluarnerulersut oqarsinnaavugut. Uuliasiorfimmi alla, Chevron, tamanut qanittukkut nalunaarpoq, qeqertat Shetlandit Savalimmiullu killeqarfiinut qanittumi uuliamik qalluisoqarsinnaaneranik misissuiniarluni.