Brintiliorniaqatigiit pilersinneqalerput

Kalaallit Nunaat, Island, Savalimmiullu peqatigiiffimmik pilersitsinialerput, peqatigiiffiup siunertaraa brintimik atuilluni nukissiulersinnaanerup ineriartortinnissaa, paasisimaneqalernerunissarlu. Nukissiorfimmiit taama paasissutissiisoqarpoq.

Peqatigiiffik aggustusip arfineq-pingajuani pilersinniarneqarpoq, pilersitsiniartullu atlantikup avannaani nunat, tassaasut Kalaallit Nunaat, Island, Savalimmiut Nunavullu peqataasoralugit aallartissaaq. Pilersitsinermi brintimik nukissiornermut tunngatillugu paasisimasat ilimagisallu eqqartorneqassapput.

Nukissiorfimmiit pingaartinneqarpoq nukissiutilerisut suliffeqarfiillu piujuartitsineq siunertaralugu nukissiornermik ineriartortitsiniartut suleqatigissallugit.

Utoqqarmiut Kangerluarsunnguani erngup nukinganik innaallagissiorfiup innaallagialiaa atorneqanngitsoq brintiliorniarnermut suliniuteqarnerminnik Nukissiorfiit saqqummiussissapput, soorlu aamma siunissami nukissiutitigut brintimik tunngaveqarlutik inuiaqatigiinnut suliniutitik misilittakkatillu islandimiut saqqummiunniaraat. Qeqertaaqqami Nolsoy-imi piujuartitsineq tunngavigalugu, brintillu nukinganik nukissiorniarneq, savalimmiormiut saqqummiutissavaat.

Peqatigiiffimmik North Atlantic Hydrogen Associationimik pilersitsinermi inuit 21-it peqataassapput.