Brintiliorfik siulleq misilerarneqarpoq
Nukissiorfiit qullersaqarfiata Nuummiittup saavanut avataarsuani atortunut eqqaanarsinnaasoq innermik aniatitsisoq inissinneqarsimavoq, taannali tassaaginnarpoq brintiliorfik siulleq misileraaviusoq. Nukissiorfimmi paasissutissiinermi pisortaq Louise Johansson ima nassuiaavoq.
- Brintiliorfik suli piariinngilaq, aatsaat maanga apuuteqqammerpoq, ajunnginnersoq paasiniarlugu sivisujaamik misilittarneqaqqaassaaq, Louise Johansson oqarpoq.
Erngup nukinga Utoqqarmiut Kangerluarsunnguaneersoq maangaannarttartoq brintiliorfik atorlugu siunissami toqqorterneqartalissasoq takorloorneqarpoq. Brintiliorfik Nuummiittoq innuttaasut ilisimasaqarnerulernissaannut atorneqassaaq.
- Una teknikki nutaaq pillugu ilisimasaqarnerulerniarluta brintiliorfik pisiaraarput, nunatsinni qanoq atorneqarsinnaanera misissorniarlugu. Inuiaqatigiit brinti pillugu paasisimasaqarnerulernissaat aamma anguniakkatta ilagaat, soqutiginnittunullu iliniartitsissutissatut atorneqassalluni, Louise Johanssson oqarpoq.
Nukissiorfiit qullersaqarfiata ilassutissaata brintiliorfimmit innaallagissamik pilersorneqarnissaa, misileraatissat siulliit ilagissagaat naatsorsuutigineqarpoq.
