Brintiliorfik atoqqaartippaat

Nuup kujataani Utoqqarmiut Kangerluarsunnguani innaallagissiorfiup sarfaq sinneqartoorutaa brintinngorlugu suliarineqartalersussaavoq. Sarfarlu taanna biilinut batterimik ingerlateqartunut ilaatigut atugassiassaassaaq.

- Taamatut misileraanissatsinnut pissutaavoq, maani Nuummi, aammalumi Kalaallit Nunaanni aqquserngit naatsunngummata, tassalu aqquserngit biilinut batterimit ingerlateqartut tulluarlutik. Unnukkut biilerunnaaruit taamaallaat sarfaliuummut ikkussiguit aqaguani ulloq naallugu biilersinnaalissaatit.

Nukissiorfiit pisortaanera Svend Hardenberg taama oqarpoq.

Brinti gassit ilagaat, taamaattunngorsinnaalluni imermi brinti iltilu avissaartikkaanni. Nuup kujataani Utoqqarmiut Kangerluarsunnguanni imeq atorlugu innaallagissiorfimmit sarfaq sinneqartoorutaasoq brintinngortinneqartassaaq. Brinti puiaasanut toqqorneqarsinnaavoq ukiumi nukissiuutitut atorsinnaanngorlugu.

Utoqqarmiut Kangerluarsunnguani innaallagissiorfiup sarfaq pilersitaa 70 procenti taamaallaat atorneqartarpoq, sinneralu maangaannartinneqartarluni.

- Tassa ippassaq sarfamik eqqaaginnaraluarpugut, ullumikkumiilli taamaaliortarunnaarpugut. Sarfaq eqqaannartagarput maanna brintinngorlugu suliarisalerparput, tamannalu pissaganarlunilu nuannaarutissaavoq.

Nukissiorfiit pisortaanera Svend Hardenberg naggasiivoq.

Brintiliorfik nutaaq Nuummi Nukissiorfiit allaffeqarfiata eqqaaniippoq, taanna nukimmik ukioq naallugu illunut 20-nut pilersuisinnaavoq.