Brigitte Bardotip Savalimmiuni niisarniartarneq unitsinniarpaa
Niisarnat hunnorujulikkaat Savalimmiuni aasat tamaasa sissamut ungoorneqartarput, savimmillu toqorarneqartarlutik. Aattaqaqisumillu niisarnarniartarneq tamanna pissutigalugu avatangiisinik illersuiniaqatigiit Savalimmiormiunik isornartorsiuisarput.
Savalimmiormiut namminersorlutik ingerlasuupput, taamaattorli Savalimmiut imartaannik nakkutilliineq Danmarkip suli isumagisaralugu. Taamaattumik Bardot-p Danmark isornartorsiorpaa.
- Taamatut amiilaarnartumik pissusilersortarneq Danmarkimut Savalimmiunullu nikanarsaataavoq, Bardot aamma Sea Shepherd dronnging Margrethemut ataatsimoortumik allakkamminni taama allapput.
- Tamanna piniarnerunngilaq, uumasunilli toqoraanerulluni. Tamanna ileqqutoqaavoq pisoqalisimasoq, ullutsinni akuerineqarsinnaanngitsoq, ilaatigut taama allapput.
Savalimmiuni nunanut allanut allaffeqarfimmit oqaaseqartitaq Kate Sanderson oqarpoq, allakkat nutaarsiassartaqanngitsut.
- Tamanna piniarnertulli allatulli piniarneruvoq nalinginnaasoq. Soqqusaappasittuuvoq, inuppalaartuunngitsutullu pissuseqarsinnaalluni. Kisianni inuit uumasunik tamakkuninnga savimmik toqoraasarnermut naammagittaalliortut, assersuutigalugu puulukinik toqoraavimmiissimanngisaannarput, Kate Sanderson oqarpoq.