Bardot 76-inik ukiulik Sverigemi avatangiisinut ministerimut, Andreas Carlgrenimut allappoq amaqqunik piniartarneq qangarsuaq pissusiusimasoq unitsittariaqartoq. Sverigemi ukiuni 46-ni amarorniaqqusaangereerluni siorna piniarneq aallartinneqaqqippoq.
Bardot ministerimut ilaatigut allappoq; "ministeri qinnuigaakkit uumasunnguit nallinnartut amerlavalaanngereersut piniarunnaaqqullugit peqqillutik amerliartorniassammata".
Bardotip saaffiginninerminut pissuterpiaa Sverigemi pinngortitaq pillugu pisortat piniaqqusinerminnut aamma pissutigaat, tassa amaqqut peqqissuutinniarlugit ukiumut 20-t pisarineqartarnissaat akuersissutigigamikkit.
Sverigemi amaqqut amaqqunik allanik akuneqartanngikkunik peqqikunnaartussaammata piujuarnissaat anguniarlugu ilanngartoriarlugit nunanit allaneersunik akoortarpaat.
Sverigep avannarpasinnersaani amaqqut 210-nik amerlassuseqarnissaat siunertarineqarpoq, tamannalu Brigitte Bardotip allanngortinnavianngilaa.