Bright Green Youth: Inuusuttut silap pissusaa pillugu tammaarsimaarfiat

Silamulli tunngasunut ministerit, silasiortut ilisimatuulluunniit katersuutissanngillat nunarsuup kissatsikiartornerata qanoq unikaallatsinneqarnissaa pillugu oqallinniarlutik.

Bright Green Youthimi tassaavoq nunarsuaq tamakkerlugu inusuttut sila pillugu tammaarsimaffiat. Taakkua Sønderborgimi katersuutissapput ilaatigut nunarsuarmi siuttunut Københavnimi decembarimi sila pillugu ataatsimeersualerpata inassuteqaateqassapput.

Pipaluk Lind 17-inik ukiulik Nuummeersoq peqataassaaq ataatsimeersuarnermi kalaallinut inuusuttunut sinniisuulluni. Taassuma inuusuttut, silamut tunngasunut ministerit suliamullu tunngasumik ilisimasallit atorsinnaasaannik tunniussaqarsinnaanerat qularutiginngilaa.

- Nunarsuarmi innuttaasuni inuusuttut ilaattut pisut qanoq isiginerlugit nalunaartariaqarpugut. Sila pillugu oqallinneq maannakkut annertoorujussuarmik politikkilersuiffiuvoq, maanilu ataatsimeersuarnerup tamanna susassarinngilaa. CO2-mik taamaallaat aniatitsinitta millisinnissaa pillugu aaqqiissuteqarnissaq nassaariniartariaqarparput. Taavalu inuusuttut nipaat ersarissuusariaqarluni, taama isumaqarpunga.

Taamatut Pipaluk Lind aasakkut atuanngiffeqareernerup kingornagut Nuummi GU-mi 2.g-mi aallartittussaq oqarpoq. Taassumalu erseqqissarpaa inuusuttut tusaaneqartariaqartut.

Kalaallit Nunaanni inuusuttutut inuttullu tamanna isumakuluutigaara, isumaqaramami Kalaallit Nunaat taanna ullumikkut isigisara aamma ukiut 100-t qaangiuppara suli taamaassanersoq. Maannakkut kinguaariit erngutaat ernutaqqiutaallu kangerlummut sermimik iigartartulimmut suli ingerlasinnaassapput Avannaanilu nannut angallatissallutik. Tamanna tassaavoq eqqarsaatiga. Kulturitsinni immikkoortortat ulluinnarnilu inuunerput inuttut inuunitsinnut annertuumik pingaarutilik, aammalu ukiut 100-t qaangiuppata kissatsikkiartorneq pissutigalugu suli atassanersut.

Pipaluk Lind neriuppoq nunarsuarmi siuttut tusarnaarumaartut - nunarsuarmilu inuusuttut eqqarsaatigalugit, Københavnimi decembarimi ataatsimeersuassallutik issaagunik.

- Taamaakkaluartoq uagut tassaavugut nunarsuarmi maani inooqqittussat.

Sønderborgimi inuusuttut sila pillugu ataatsimeersuarnissaat aggustip aqqarnanni aallartissaaq inuusuttullu 500-t nunarsuarmit tamarmeersut peqataassallutik.