Breivikimik nuannaartorisalik USA-mi toqoraaniarsimasutut pasineqartoq
Tigusarineqartoq nunagisamik pingaartitsisutut imminut taagorpoq, qaamasunik amilinnik salliutitsiniartutut imminut taalluni, inorersorlu Norgemeersoq Anders Behring Breivik nuannaartoralugu aamma oqaatigalugu.
Angut sapaatip-akunnerata siuliani tigusarineqarpoq. USA-mi naalagaaffimmi Marylandimi illua pakasaalluni misissuiffigineqarmat illuinnarsuutit 15-it, imassallu 1000-init amerlanerusut nassaarineqartut politiit nalunaarutigaat.
USA-mi demokratit akornanni nuimasut, USA-milu nutaarsiassaqartitsivinni sulisut nuimasut arlallit toqutaasussatut allattorsimasuutigigai aamma nalunaarutigineqarpoq.
Demokratit Innuttaasut sinnerlugit sinniisoqarfimmi siulittaasuat Nancy Pelosi, CNN-imilu MSNBC-milu nutaarsiassalerisut arlallit ilaatigut allattorsimaffimmiittut oqaatigineqarluni.
Angut tigusarineqartoq, Anders Behring Breivikip anguniagaatut saqqummersitaani 2017-imili isumassarsiniarsimasoq, eqqartuussivimmi allattorsimaffiit ilaanni atuarneqarsinnaavoq.
Breivik, inunnik arfineq-pingasunik Oslomi 2011-mi qaartartumeerinermi toqutsivoq, inuillu allat 69-it, amerlanerit inuusuttut, Oslop ungasinngisaani qeqertami Utøyamiittut aallaallugit toqullugit.
