Attaveqaqatigiittarfinni Bolsonarop Norgemik Savalimmiunillu paarlaassinera mitaatigineqarpoq.Assi: Evaristo Sa / AFP / Ritzau Scanpix

Brasiliap præsidentiata Norge saassuppaa kukkullunili

Brasiliap præsidentiata Jair Bolsonarop Norge uumigilluinnarpaa. Brasiliami kiattup orpippassuisa illersorneqarnissaanut tapiissutiminik Norgep unitsitsinera tamatumunnga peqqutaavoq.

Tassami Brasiliap orpippassuarujussuinik killuineq silap pissusianut sunniuteqanngitsoq Bolsonaro isumaqarpoq. Taamaattumik Amazonimi orpippassuarnik killuinerup annertuseqarnissaanik akuersissuteqarsimavoq. 

Tamanna tunngavigalugu Norgep Tyskland peqatigalugu Amazonimi orpippassuit atatiinnarneqarnissaannut tapiissutigisartakkatik unitsippaat.  

Taamatut aalajangerneq Bolsonarop kamaatigilluinnarpaa tweetikkullu Norge sorraatsumik arfanniartartuuneralugu.   

Tweeternera videoliamik taperserneqarpoq, tassanilu inuit sissami savik atorlugu arfernik sissaq aammik aapalaartuinnanngorlugu toqoraasut takuneqarsinnaapput. 

- Takusiuk, qanoq arfernik toqoraaneq Norgemit aningaasatigut tapersersorneqartoq, allappoq. 

Uffa ukiumoortumik Savalimmiuni niisarnarniarneq videoliarineqarsimasoq, tassalu Bolsonarop ajornartorsiutaa.

- Videop Norgeminngaanneersuunnginnera uppernarsarsinnaavarput, Norgep aalisarnermut ministereqarfia allappoq. 

Attaveqaqatigiittarfinni Bolsonarop Norgemik Savalimmiunillu paarlaassinera mitaatigineqarpoq.

- Ilumoortuunngitsunik paasisssutissiineq pinerluttuliorneruvoq, oqaaseqaatit ilaanni taama allassimavoq. 

Brasiliami kiattup orpippassuisa illersorneqarnissaannut Norge 5,6 milliarder koruuninik ukiuni kingullerni 11-nni tunniussisimavoq.  

Silap pissusianik ilisimatuut naapertorlugit Brasiliap orpippassuisa annikillineqannginnissaat pingaarutilerujussuuvoq. Annikillineqassappata Naalagaaffiit Peqatigiit Parisimi 2016-imi silap pissusianik isumaqatigiissutaanni anguniagassat angunissaat ajornarsissaaq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat