Brasiliami qarsutsinersuaqarmat 50-it ajunaarput
Brasiliami illoqarfiit pingaarnersaanni Rio de Janeiromi sialussuarujussuarnerata kinguneranik qarsutsineqarmat, inuit ikinnerpaamik 50-it ajunaarput, aqqusernillu imermik qarsutsivigineqarsimasut tamaani tv-qarfiit nalunaarutigaat.
Nalunaaquttap akunneri 15-init sinnerlugit kipissanani sialussuarsimavoq.
Illoqarfimmiut isersimaannaqqullugit illoqarfiullu eqqanukarnaveersaaqqullugit illoqarfiup borgmesteriata ilungersorluni kajumissaarpai, tamaani aqqusernit aqqutigineqarsinnaanngimmata.
- Illoqarfimmi aqqusernit annerit tamarmik qarsutsinersuaqarnera pissutigalugu matoqqasut, borgmesteri nalunaarpoq, taassumalu erseqqissarpaa kikkulluunniit pisortat peqqussutaannut malinnikkumanngitsut assorsuaq ulorianartorsiussasut.